O vindeiro sábado 12 de Novembro celebrarase en Santa Comba a Festa do Cachibol Galego.
O sábado 12 de Novembro estará movidiño na capital da Terra do Xallas. Ademáis do magnífico Magosto que está organizando a Comisión de festas de Santa Comba, o Pavillón Municipal de Fontenla será o escenario dunha nova xuntanza do Cachibol galego.

Si antes as cidades de Vigo e Ourense foron as anfitrionas para os xogadores e xogadoras deste deporte adaptado, será agora Santa Comba a que acolla a máis dun cento de deportistas de toda Galicia, nunha festa onde prime o xogo limpo e a amizade.

O cachibol é un deporte único en Galicia dentro de España e de Europa. Só en México existen competicións reguladas e encontros de diversas ligas por idades.

Este singular deporte foi importado por Antonio Piñeiro, mestre de Educación física vigués, que o coñeceu nunha viaxe a terras aztecas. Con posterioridade, extendeuse en Galicia a través de distintas iniciativas de entidades públicas e asociativas, ainda que agora tan só pervive na área metropolitana de Vigo, en Ourense, en Mesía e en Santa Comba.

O cachibol é un deporte coas súas regras propias, coa especial mención a que o resultado ideal é o empate, porque o grande da actividade é o proceso, o feito de xogar e relacionarse a través dun balón e de 2 equipos que xogan xuntos, non en contra.
O deporte aseméllase ó voleibol, aínda que coa posibilidade de coller o balón coa man, e sin poder empregar unha forza excesiva. Trátase de empregar a imaxinación, a coordinación e os enganos corporais, para conseguir que o balón caia no campo do oponente.

En Santa Comba iniciouse esta deporte a través dun programa da Xunta de Galicia no ano 2008, e a partir do ano 2009, o Concello asumiu o cachibol como actividade dentro do seu programa, que regularmente reune a máis de 40 persoas no Pavillón Municipal xalleiro 2 días á semana.

As xogadoras ( e xogadores) xalleiros participaron en diversos encontros a nivel autonómico en Ourense, Vilalba e Vigo en 2 ocasións, onde manteñen unha gran relación coa Asociación Deportiva Xogara, que difunde esta actividade en diversos centros e organizacións da capital olívica.